QUINCE DE LAS PRINCIPALES EMPRESAS GALLEGAS PARTICIPAN EN LA NUEVA FUNDACION GAIAS
- As empresas iniciais que forman parte do Padroado son: Caixa Galicia, Caixanova, Unión Fenosa, Inditex, Inveravante, Fundación Barrié de la Maza, Banco Gallego, R, Gadisa, Hijos de J. Rivera, Coren, Epifanio Campo, Transmombus, Grupo Nossa Terra 21 e Hijos de J. Barreras
- O obxectivo deste modelo de xestión mixto é incentivar o financiamento e a participación de entidades privadas, así como facilitar unha xestión eficiente do proxecto cultural xa deseñado
- O grao de execución das obras da Cidade da Cultura supera, a día de hoxe, o 59%
- Os primeiros edificios, Arquivo Nacional e Biblioteca Nacional, estarán a pleno rendemento a finais de 2009 e o complexo cultural estará rematado en 2012
Santiago, 29 de decembro de 2008.- O presidente da Xunta de Galicia, Emilio Pérez Touriño, a conselleira de Cultura e Deporte, Ánxela Bugallo, e Juan Manuel Urgoiti, presidente do padroado da nova Fundación Gaiás, presentaron hoxe, xunto aos líderes de 15 empresas galegas, os obxectivos deste novo organismo que xestionará parte do complexo da Cidade da Cultura.
Pola banda das principais empresas galegas presentes no Padroado estiveron José Luis Méndez (Caixa Galicia), Julio Fernández Gayoso (Caixanova e Transmombus), Pedro López Jiménez (Unión Fenosa), Pablo Isla (Inditex), Luis Alvargonzález (Inveravante), José María Arias (Fundación Barrié), o propio Urgoiti por Banco Gallego, Honorato López Isla (R), Roberto Tojeiro (Gadisa), Antonio Viejo (Hijos de J. Rivera), Manuel Gómez Franqueira (Coren), Epifanio Campo (Epifanio Campo), José Silveira (Grupo Nossa Terra 21) e José Francisco González Viñas (Hijos de J. Barreras).
O padroado celebrou esta mañá a reunión constitutiva da Fundación Gaiás que arrinca unha vez pechado o proceso de elaboración do proxecto cultural e os plans directores para cada centro. Co impulso a este novo órgano de xestión o Goberno anticípase á posta en marcha do complexo, incorporando o apoio privado a un proxecto que está chamada a converterse nunha das iniciativas culturais máis importantes de Europa.
O novo modelo de xestión da Cidade da Cultura, similar aos de proxectos internacionais de semellantes características, responde á necesidade de implicar ao conxunto do sector cultural, das súas institucións, ao empresariado galego e á cidadanía galega. Con este obxectivo, coexistirán dúas fundacións, a nova Fundación Gaiás coa actual Fundación Cidade da Cultura de Galicia, encargada de asegurar o investimento público realizado.
O obxectivo da nova Fundación é incentivar o financiamento externo e a participación de entidades privadas, así como facilitar unha xestión eficiente. O novo ente encargarase de desenvolver os plans directores do Centro de Arte Internacional, o Museo dos Nenos e o Escenario Obradoiro. Ademais xestionará parte das actividades transversais da Cidade da Cultura: a xestión de marca, que implica o merchandising e dereitos de imaxe; a xestión de espazos comerciais, as tendas dos museos e os locais de hostelaría; a xestión de espazos para a realización de actividades culturais; e os servizos complementarios, entre outras.
Para a constitución do novo organismo, o 49% do capital foi achegado pola Fundación Cidade da Cultura de Galicia e o 51% restante por quince das principais empresas galegas. O padroado da nova fundación está conformado por representantes da Xunta de Galicia, a través da Fundación Cidade da Cultura, e por representantes das empresas participantes. [Ver Anexo coas empresas padroeiras situado ao final].
Mentres, a Fundación Cidade da Cultura mantén a propiedade pública dos activos, a coordinación loxística e cultural do complexo, así como a xestión dos centros de especial sensibilidade para o desenvolvemento cultural.
Execución do proxecto
A día de hoxe, están executadas máis do 59% das obras da Cidade da Cultura, fronte ao 25% que había en setembro do 2005, o que supón un incremento do 33% no grao de execución dos edificios. A finais de 2009 estarán xa a pleno rendemento o Arquivo Nacional e a Biblioteca Nacional, edificios que neste momento teñen un grao de execución do 100% e do 97% respectivamente. O remate total das obras do complexo está previsto para o ano 2012.
A Cidade da Cultura é xa un proxecto de referencia internacional nos planos cultural e arquitectónico. Aínda que o seu valor icónico excepcional ofrece una nova visibilidade ao país, é o deseño dos seus contidos o que converten nun motor para o desenvolvemento cultural, social e económico.
A súa oferta cultural está dirixida a ampliar, de xeito moi notable, o turismo e o público cultural. Neste sentido, a tarefa da nova Fundación Gaiás será dinamizar os espazos que xestionará para asentalos no plano internacional.
- Centro de Arte Internacional centra a súa actividade nas expresións e relacións artísticas entre América e Europa. Funciona como espazo para exposicións, de arte moderna e contemporánea, procedentes de institucións culturais de prestixio internacional, a través de acordos de colaboración.
- Museo dos Nenos, un espazo lúdico-didáctico deseñado para cativos entre 3 e 12 anos. Trátase da primeira experiencia deste tipo en toda a Península, e pretende ser un lugar de aprendizaxe da creación artística e da educación en valores.
- Escenario Obradoiro, auditorio que, pola súa capacidade, permite a entrada de producións escénicas galegas en circuítos internacionais e a chegada de espectáculos de gran formato. Ofrece unha programación cultural estable, con programas para a innovación no ámbito artístico. É ademais un centro de recursos para a creación.
- Espazo públicos e comerciais que, abeirados nas fachadas interiores, ofrecen enormes posibilidades para a súa explotación económica.
O Goberno galego mantén a xestión daqueles centros de especial sensibilidade para o desenvolvemento da política cultural galega:
- Arquivo Nacional, cabeceira do sistema galego de arquivos, encargado da coordinación e asesoramento da política arquivística en Galicia. Na actualidade a construción está xa rematada e o proxecto está en marcha. Gabriel Quiroga, ex director do Arquivo do Reino de Galicia, foi nomeado hai uns meses director do centro.
- Biblioteca Nacional, centro cabeceira do sistema bibliotecario galego. As súas instalacións abeiran o Centro IBBY de literatura infantil e xuvenil da diversidade cultural, un centro de referencia a nivel internacional. Foi nomeado director do centro Xosé Regos, que anteriormente ocupou entre outros o cargo de director do Consorcio de Bibliotecas Universitarias de Galicia.
- Museo da Historia de Galicia, observatorio da historia de Galicia e das tendencias culturais actuais, céntrase na divulgación internacional do patrimonio histórico-cultural galego.
- Centro de Investigación do Patrimonio, a estrutura tecnolóxica para a análise, estudo, desenvolvemento e difusión de coñecementos, métodos e técnicas de conservación, restauración e difusión do patrimonio cultural.
Catro obxectivos
A visión de conxunto da Cidade da Cultura baséase en catro obxectivos fundamentais. O primeiro, que a Cidade da Cultura sexa o eixo vertebrador de servizos culturais en Galicia, para o que xerará recursos que complementen e coordinen os servizos xa existentes no país. O segundo obxectivo é servir de vehículo de relación e promoción exterior, ao contar cunhas instalacións singulares de referencia e con órganos de colaboración e promoción no ámbito cultural.
O terceiro obxectivo do proxecto é funcionar como axente promotor da cultura en Galicia, cunha oferta cultural diversa, de calidade e accesible, e ofrecendo ademais recursos para a creación cultural. Por último, búscase que a Cidade da Cultura sexa un activo para o desenvolvemento económico. Con este obxectivo desenvolveranse iniciativas que permitan a sustentabilidade económica da Cidade, o reforzo das empresas culturais e a xeración indirecta de riqueza e actividade económica para toda Galicia, incluíndo a creación de novos atractivos para o turismo.
COMPOSICIÓN DO PADROADO DA FUNDACIÓN GAIÁS
PADROEIROS
ACHEGA
Público
(48,91%)
Fundación Cidade da Cultura
11.250.000
Privada
(51,09%)
Caixa Galicia
3.000.000
Caixanova
3.000.000
Unión Fenosa
1.000.000
Inditex
1.000.000
Inveravante
1.000.000
Fundación Pedro Barrié de la Maza
500.000
Banco Gallego
250.000
Grupo R
250.000
Gadisa (Grupo Tojeiro)
250.000
Hijos de J. Rivera
250.000
Grupo Coren
250.000
Epifanio Campo
250.000
Mombus
250.000
Grupo Nossa Terra 21
250.000
Hijos de J. Barreras, S.A.
250.000
TOTAL
23.000.000
PRESIDENTE DA FUNDACIÓN GAIÁS
Juan Manuel Urgoiti López-Ocaña preside na actualidade o Banco Gallego e é conselleiro de Inditex. Foi presidente do Real Patronato do Museo Nacional Centro de Arte Reina Sofía e membro do Real Patronato do Museo del Prado e da Biblioteca Nacional. Na actualidade preside a fundación privada José Antonio de Castro e é membro do Internacional Council do MOMA (Museum of Modern Art, Nova York), así como doutras fundacións e institucións culturais.
...
